IPABALIK sa lugar kung asa nagagikan ang mga hotdog nga dunay sagol nga karneng baboy atol sa gihimong inspeksiyon sa Anti-African Swine Fever (ASF) Task Force niadtong Lunes, Disyembre 16.

Anaa sa pito ka mga kahon sa jumbo hotdog nga mga anaa sa 70 ka kilo ang nakumpiska sa Anti-ASF Task Force sa pagpangulo ni Dr. Lucien Anthony Acac, sa City Veterinary Office sa Alwana, Cugma, dakbayan sa Cagayan de Oro.

Sa pakighinabi sa SunStar Superbalita kang Acac, giingong wala gideklara ang jumbo hotdog gawas lang sa processed chicken tocino ug chicken ham.

“We discovered and we found out it contains seven boxes of jumbo hotdog with the pork ingredients. But we compared it to their documents and it was not declared that there was that seven boxes of jumbo hotdogs inside that van,” matud ni Acac.

Gidugang pa niini nga kung wala nila kini gisusi pag-ayo posibleng makalusot ang maong mga produkto.

“So gi-insert nila. Dunay mga insertions so we noticed that. Ang ila diay pag-arrange sa ilang mga boxes katong hotdog gi-una nila pag-check-in. So, lisod gyud kaayo kung superficial lang ang atong tan-awon,” dugang pa.

Giingong ipabalik kini sa asa kini nagagikan ilabi na sa Manila.

“Unsay gihimo, adto gi-hold to siya, picturan then documentation advice to ship back to the point of origin,” dugang niini.

“Ang amo sa among executive order sa 172 sa temporary total ban mao ra gyud na simple shift back to the point of origin. Wala na nang filing of cases. Wala na na siya,” saysay pa ni Acac.

Giingong siguraduhon lamang nga ang maong mga produkto mabalik sa nahisgutang dapit ug dili ipundo sa storage sa maong dapit.

Nasayran usab nga niadtong inspeksiyon sa Anti-ASF Task force nga duna sila’y gitangtang nga mga produkto sulod sa usa ka mall sa dakbayan, apan sa dihang napakita ang mga dokumento rason nga nabaligya na kini pagbalik.

Kahinumdoman nga wala pa gitangtang ang maong ordinansa nga temporaryo nga pag-ban sa mga produkto nga dunay sagol nga karneng baboy nga nagagikan sa kaulohan paingon sa dakbayan.