LIMA ka mga indibidwal ang nasikop sa Cagayan de Oro Police Office (Cocpo) atol sa Oplan Galugad niadtong nilabay nga tibuok semana sa dakbayan sa Cagayan de Oro.

Anaa sa 71 ka mga tawo ang nasikop kinsa nakalapas sa ordinansa sa dakbayan ilabi na kining pagdili sa pagpanigarilyo sa pampublikong lugar.

Gibutyag ni Police Major Evan Viñas, tigpamaba sa Cocpo, nga tanan nga nakalapas sa balaod ilang sikupon ug pahimangnoan.

“Apil tanan, mga city ordinances susama anang ‘no smoke zone’ ug naa ka diha ma caution ka sa atong unipormado or dili unipormadong pulis so madala gyud ka kay duna man kay tulobagon kay duna may oridinansa,” matud ni Viñas.

Gidugang pa nga posibleng makabayad kini og multa o pahimangnoan nga dunay ordinansa ang siyudad kalabot niini.

Lakip usab ang mga nag-inom sa kadaplinan ang gi-aksiyonan sa mga otoridad pinaagi sa pagsikop kanila lakip na sa mga sugal, pagpanulis, pagpanglabni, rape, pagpatay ug uban pang mga kaso ug labi na ang mga dunay warrant of arrest.

Nasayran nga atol sa Oplan Galugad pinakadaghang nasikop mao ang Police Station 2 sa Cogon nga anaa sa 13.