MOABOT na ngadto sa 85 ka mga drug suspek ang nadakpan sa hiniusang pwersa sa kapolisan Philippine Drug Enforcement Agency-Misamis Oriental.

Kini gikompirma IA-5 Rubylyn Alfaro, Provincial Officer sa PDEA-MisOr atol sa Provincial Peace and Order Council (PPOC) meeting niadtong Lunes.

Ang datos nagsugod sa bulan sa Hunyo hangtod ning bulan sa Agusto.

Sa maong gidaghanon nasuta nga 82 niini mga tigpayuhot sa ginadili nga druga samtang 3 niini naghupot lamang.

Moabot sa 80 ka mga drug operations ang nahimo sama sa buy bust operation nga adunay 64 ang mga nadakpan; 9 ang nasilbihan sa search warrant; 1 niini pinaagi sa warrant of arrest, ug 6 sa search and seizure.

Siyam sab niini ang anaa sa drug list samtang 76 niini gituohang bag-o lang sa negosyo kinsa wala malakip sa listahan.

Gipasabot usab ni Alfaro nga ang text ug tawag sa cellphone ang usa sa paagi aron maka makapamaligya og iligal nga druga.

Adunay mga higayon nga gihimong runner ang kabatan-onan samtang nasuta nga gamit ang mga pribadong sakyanan ug mga barko gideliver ang ginadili nga druga lakip sab ang pagpaago sa pagpadala kon parcel.

Sa pagkakaron ang PDEA uban ang kapolisan padayon sa iang gihimong Barangay Drug Clearing Program dungan na usab sa mando ni Presidente Rodrigo Duterte nga dili hunungon ang pagpangdakop sa mga nalambigit sa iligal nga druga.