PADAYON sa paghatod ug serbisyo ang party lists nga Abante Mindanao taliwala paman nga wala kini nakasulod niaging piliay.

Matud ni kanhi congresswoman Jing Rodriguez, kinsa maoy nagdumala sa partido, niingon nga consistent nga nidaog kini nga party list sugod niadtong tuig 2010 apan niadtong piliay sa 2016 20,000 ka boto na lamang ang kulang aron makasulod kini sa hawanan sa kamara.

Apan wala diha natapos ang ilang paghatod og serbisyo ngadto sa katawhan sa Mindanao tungod sa iyang paglibot suroy iyang nakita nga daghan pa kaayong problema nga angayan tubagon sa pulo.

Dugang ni Jing nga usa ang panubig sa probinsya sa Misamis Oriental ang gikinahanglan kaayo hinungdan nga kung mahatagan sila og kahigayonan nga makasulod karong piliay usa kini sa ilang tutokan nga problema.

Ang iyang kapikas nga si Congressman Maxi Rodriguez nipaabot ngadto sa katawhan sa Misamis Oriental ug mga kasikbit nga dapit nga karon pa daan ang mga barangay nga nagproblema og panubig ang mopadala na og sulat kanila aron ila kining maprayoridad sa umaabot.

Giluwatan kini nila nga pasalig atol sa press conference kalabot sa pinirmaha o partnership nila sa Abamin ngadto sa Servants of All Global Inc. aron mas mapalambo ang ilang pagpalambo sa komunidad.