PADAYON ang pag-ubos sa ihap sa mga aktibo ug bag-ong mga kaso sa coronavirus disease-2019 (Covid-19) sa Cagayan de Oro City.

Anaa na sa 116 ang aktibo nga mga kaso ug usa ra ang natala nga mga bag-ong kaso sa dakbayan.

Matud ni City Health Office medical officer Dr. Ted Yu, ang usa ka local index nga kaso usa ka 51-year-old nga lalaki nga residente sa Barangay Bugo.

Miabot sa 20,424 ang kinatibuk-ang ihap sa mga kaso sa Covid-19 sa dakbayan.

Ang Cagayan de Oro adunay 116 active cases, 16 niini na-admit sa Northern Mindanao Medical Center ug uban pang mga ospital sa syudad, ug 100 ang mga outpatient.

Nakatala usab og usa ka coronavirus-positive nga kaso nga karon naka-recover human nagnegatibo ang resulta sa ilang repeat swab test.

Anaa na karon sa 19,457 ang ihap sa mga nakarekober nga mga kaso sa dakbayan.

Ang ihap sa mga namatay sa Covid-19 sa syudad naa sa 851.