BUNTAG na dihang nadiskubre sa iyang mga anak nga wala nay kinabuhi ang ilang amahan nga gipusil sulod sa kwarto niini niadtong niaging adlaw sa Sitio Nala, Barangay Halapitan, lungsod sa San Fernando, probinsya sa Bukidnon.

Giila ang biktima nga mao si Joseph D. Ofonda, 35, minyo, usa ka habal-habal driver, residente sa dapit.

Sa imbestigasyon sa San Fernando Municipal Police Station sa pagpanguna ni Police Master Sergeant Nestor K. Aniñon, nasuta gikan sa iyang duha ka mga minor de edad nga mga anak nga kining biktima natulog sa lahi nga lawak.

Mga alas 12:30 sa kaadlawon, nadungog ang kusog nga buto. Wala lang kini gidoulan sa mga anak tungod sa kahadlok nga gibati hangtod nakatulog og balik apan buntag na nga ilang nadiskubre nga ang ilang amahan gipusil sulod sa lawak niini ug wala nay kinabuhi.

Nahipos sa crime scene ang basyo sa kalibre 45. Giimbestigahan sab karon sa kapolisan ang motibo sa pagpatay sa biktima ug unsa ang mga gikalambigitan niini.