MOABOT onse ka mga samad tinigbasan ang naangkon sa usa ka amahan human gitigbas sa iyang anak alas 9:00 sa gabii sa Purok-4, Brgy. Violeta, siyudad sa Malaybalay City, Bukidnon.

Patay si Alfredo M. Paelmarin Jr., 69, balo, usa ka mag-uuma sa dapit.

Gitumbok nga suspetsado ang anak nga giilang si Jorry O. Paelmarin alyas Totong, 33, ulitawo, usa ka laborer.

Sa imbestigasyon sa Malaybalay City Police Station sa pagpanguna ni Police Colonel Jerry Tambis nadawat ang inpormasyon labot sa biktima nga giingong daghang samad tinigbasan sulod sa payag nga gipuy-an sa anak.

Maoy naabtan sa kapulisan naligo sa dugo ang biktima ug sa ihap moabot 11 ka samad naangkon sa biktima.

Gisuwayan pa og dala sa Bukidnon Provincial Hospital apan dead on arrival.

Ang suspek nadakpan pinaagi sa barangay official sa naasoyng barangay.

Ang igsuon niining babae namahayag nagplano na kining anak nga patyong iyang amahan.

Giingong nasumhan na ang anak sa giingong walay puas nga pagpangulata kaniya sugod pa sa gamay pa kini.

Kasong parricide gitakdang atubangon sa suspek nga karon nagtingkagol na sa prisuhan.