NAGPAKITABANG ang pamilya sa usa ka amahan human kini na-missing samtang naligo sa suba 5:00 sa hapon niadtong Huwebes, Pebrero 14 sa Barangay Balulang ning siyudad sa Cagayan de Oro.

Gituohang naanod sa suba si George Jabonillo, 53, minyo, lumad sa Cebu City apan kasamtangang ania sa siyudad sulod sa duha pa lamang ka semana gumikan na usab kay nagtrabo kini sa usa ka quarry.

Sa pakighinabi sa SunStar Superbalita kang Julie Ann, anak sa biktima nga nag-inusarang naligo ang iyang amahan apan giingong duna kini kauban sa trabaho nga nakakita sa hitabo.

Giingong nakapangayo pa og tabang sa iyang mga kauban ang biktima apan wala na maapsi.

“Nakapangayo paman siya og tabang pero wala na maapsan sa iyang mga kuyog,” matud sa anak.

Nanghinaot ug nagpakitabang ang pamilya nga unta mapalgan na ang ilang amahan.

Padayon karon ang pagpangita sa biktima apan sa pagsulat ning balita missing pa kini.