HUSTISYA karon ang singgit sa pamilya sa duha ka mga biktima sa hit and run niadtong Kalag-kalag sa Rotunda bridge, Barangay Nazareth, dakbayan sa Cagayan de Oro.

Patay si Julius Amarga, 27, minyo, taga Clementino Street, Barangay Nazareth kinsa nagmaneho sa motorsiklo nga dunay plaka nga ANF 125 samtang ang angkas niini nailang si Jason Padilla, 39, ulitawo, taga Sta. Cruz Village, Barangay Carmen.

Samtang nabilin sa crime scene ang numero sa plaka sa usa ka sakyanan nga maoy gituohang naka hit and run kang Amarga nga SUV nga dunay plaka nga VB 4327.

Sa pakighinabi Police Major Ian Borinaga, hepe sa Police Station 4 (PS4) sa Carmen, giingong sutaon nila ang tag-iya sa maong plaka aron pagpanubag sa iyang salaod.

“Tan-awon namo kay usahay raba dili na siya ang tag-iya sa sakyanan kay nabaligya na pero wala pa na-transfer ang ngalan sa bag-ong tag-iya,” matud ni Borinaga.

Nasayran nga giingong gilikayan ni Amarga ang lim-aw sa tubig sa maong dapit, apan kalit nga nabanggaan sa SUV nga ni-overtake ug nisibat kini human sa maong panghitabo.

Gisuta sa kapulisan ang numero sa maong plaka sa buhatan sa Land Transportation Office (LTO).

Samtang, nagkadaiyang panawagan ang makita sa social media sa pamilya, silingan ug mga higala nga unta masikop na ang drayber nga nakabangga ug nisibat sa maong panghitabo.

“Hustisya, Ginoo ko, alang sa higala ug silingan nga way laing gipakita kun dili ang pagkamaayo, pagkamaalagaron ug pagkamahigugmaon sa isig katawo,” sa post sa usa ka Mamert B. Mañus SJ.

Gibutyag usab ni Aryn Pasia, ig-agaw ni Padilla kinsa kasamtangang nagpabilin karon sa ospital, nga unta madakpan na ang driver sa SUV.

Ang patay nga lawas ni Amarga ang giatiman na sa nahabiling pamilya samtang pabilin usab nga nagpaalim sa ospital si Padilla human naoperahan.