SINGLE digit na, kun wala na makaabot og 10 ka kaso sa coronavirus disease (Covid-19) ang Cagayan de Oro human tulo na lang ka mga residente ang mipositibo sa virus, sumala sa report sa City Health Office sa dakbayan.

Ang kinatibuk-ang ihap sa mga kumpirmadong kaso sa Covid-19 sa syudad anaa na sa 20,287.

Sumala sa report sa City Health Office, pulos mga local index nga mga kaso ang mga bag-ong kaso sa Covid sa dakbayan.

Ang Cagayan de Oro adunay 487 ka mga active cases, 85 niini na-admit sa Northern Mindanao Medical Center ug uban pang mga ospital sa syudad, 399 ang mga outpatients, ug tulo ang mga ROFs/LSIs.

Nakatala usab og 11 ka mga coronavirus-positive nga mga kaso nga karon naka-recover human nagnegatibo ang resulta sa ilang repeat swab test.

Anaa na karon sa 18,961 ang ihap sa mga nakarekober nga mga kaso sa dakbayan.

Ang ihap sa mga namatay sa Covid-19 sa syudad naa sa 839 human walay natalang patay ang dakbayan.