PADAYONG miubos ang mga bag-ong kaso sa Covid-19 sa Cagayan de Oro human kini mitala og 93 ka mga kaso, matud sa report sa City Health Office Sabado, Septiyembre 18, 2021.

Anaa na karon sa 18,947 ang ihap sa mga kaso sa Covid-19 sa dakbayan.

Matud sa City Health Office, sa 93 ka mga bag-ong kaso, 59 niini ang mga local index nga mga kaso, 17 ang mga local cases with link, 12 ang mga lokal nga authorized persons outside residence (Apors), usa ang Apor with link, ug upat ang mga patay.

Ang Cagayan de Oro adunay 3,839 ka mga active cases, 934 niini na-admit sa Northern Mindanao Medical Center ug uban pang mga ospital sa syudad, 2,889 ang mga outpatients, ug 16 ang mga ROFs/LSIs.

Nakatala usab og 48 ka mga Covid-positive nga mga kaso nga karon naka-recover. Anaa na karon sa 14,301 ang ihap sa mga nakarekober nga mga kaso sa dakbayan.

Ang ihap sa mga namatay sa Covid-19 sa syudad anaa na sa 807.