TUNGOD kay walay trabaho ug bag-o lang nanganak, nahimo sa usa ka inahan ang pagpamaligya og ginadili nga druga hinungdan sa iyang pagkasikop.
Gitug-an ni Alexil Alvarez, 19, taga Barangay 35, dakbayan sa Cagayan de Oro kinsa nasikop niadtong Hulyo 20, 2018 alas 7 sa gabii nga bag-o lang siya misulod sa pagpamaligya og illegal nga druga.
Sa impormasiyon nga nakuha gikan sa Police Station 1 (PS1) sa Divisoria, nasayran nga wala sa listahan ang suspek apan aduna’y nakahatag og impormasiyon sa kalihokan niini.
Gi-angkon usab sa suspek nga napugos kini sa pagpamaligya kay walay magamit nga kwarta alang sa iyang anak. Giingong gisugo ra usab sa iyang ig-agaw.
Ang suspek ang nagtingkagol na sa bilanggoan sa Maharlika Detention Cell alang sa tukmang kaso nga atubangon niini.