NAKUMPISKA gikan sa usa ka kagawad ang armas, bala ug eksplosibo atol sa gipahigayong search warrant niadtong Enero 23 mga ala 1:00 sa kaadlawon sa Phase 1 Reyes Compound, Calaanan Relocation, Barangay Canitoan, Cagayan de oro City.

Sikop ang kasamtangang konsehal sa Barangay Canitoan nga si Cruz Lustre, minyo ug residente sa nahisgutang dapit.

Sa impormasiyon gikan sa kapulisan, labi na sa Police Regional Office (PRO)-Northern Mindanao, gikabutyag nga nagpahigayon ang Regional Special Operations Unit (RSOU) ug Police Station 7 (PS7) sa Bulua og operasiyon labi na pag-implementar sa search warrant ug positibong nakuhaan kini og mga armas rason nga gisikop.

Gibutyag sa kapulisan nga taod-taod na kining gipanid-an human nga dunay nagreklamo gumikan kay gapanghulga kini sa mga residente gamit ang armas.

Gidugang pa nga nasutang walay mga dokumento ang maong mga armas niini rason nga nakakuha sila og warrant batok sa suspek.

Nakuha sa posisyon niini ang duha ka rifle grenade nga dunay plastic container, usa ka kalibre 45 nga dunay magazine nga kargado og 7 ka mga buhing bala, duha ka steel magazine sa kalibre .45 pistol, 36 ka mga buhing bala sa kalibre .45 pistol, usa ka holster sa. 45, usa ka magazine pouch sa susamang armas, usa ka kalibre .38 revolver, usa ka bullet holster sa kalibre .38 ug 22 ka mga buhing bala sa M16.