SAMAD ang naangkon sa dagway sa lalaki human gidunggab ginamit ang tubo ug gipaak pa kini sa iyang kaipon niadtong nilabay nga adlaw sa Barangay 17 sa dakbayan sa Cagayan de Oro.

Ang biktima mao si Jerry (dili tinuod nga ngalan) 22, samtang ang kaipon nailang si Diana, 24, pulos residente sa nahisgutang dapit.

Sa nahipos nga impormasiyon giingong lango sa ilimnong makahubog ang babaye ug sa pag-abot sa biktima diha sa ilang panimalay gikan namasura kalit lamang kining giduslak ginamit ang tubo sa wala'y igong rason.

Matud sa lalaki nga naanad na siya nga sige og kulatahon sa iyang kaipon gumikan na usab nga magsige kini og kahubog apan dili na niini maagwanta ilabi na nga karong panahona grabe na ang nahi-aguman niini.

Human sa panghitabo nisibat ang babaye ug gidala pa ang ilang duha ka mga anak nga gikabalaka pag-ayo niini.