NAGPABILIN pa nga blangko ang pamilya ni Jonathan Rollon, 44, ug molupyo sa Calaanan, Canitoan, dakbayan sa Cagayan de Oro, kinsa naghikog gamit ang wire sa kuryente niadtong Septiyembre 23.

Sa nahipos nga impormasiyon, giingong wala pa masayod ang pamilya ug mga higala ni Rollon kung unsa ang hinungdan sa pagkutlo niini sa iyang kinabuhi.

Gibutyag sa usa sa higala ni Rollon nga sa wala pa kini naghikog, naglingaw-lingaw pa sila ug gani nagsige pa kini og pasi-aw.

Nakahisgot lamang kini sa iyang pag-undang sa trabaho gumikan kay kinahanglan nga magpa check-up kini sa iyang gihambing nga balatian ilabi na sa pagsaka sa iyang dugo apan dili kini igong rason nga tapuson niini ang iyang kinabuhi.

Nakurat na lamang kini gumikan kay mga pipila lamang ka minutos sa dihang migawas kini aron nga magpalit og sigarilyo ug sa dihang pagbalik nakitang nagbitay na ang biktima.

Sa pagsulat niini nga balita, ang patay nga lawas ang gi-atiman na sa nahabiling pamilya.