TUNGOD sa Global Positioning System kun GPS, wala na naka-ikyas ang bana uban sa gituohang kabit niini dihang nag-atang na ang asawa ug mga pulis gawas sa kwarto sa motel nga ilang gitsek-inan atol sa Valentine's Day sa Barangay Kauswagan, siyudad sa Cagayan de Oro.

Deretso nga gisikop sa mga pulis sila Vincent, 43, uban ang 29 anyos nga kaubang babaye niini dihang paggawas na sa lawak.

Sa impormasiyon gikan sa Police Station 4 (PS4) sa Carmen ubos kang Police Major Jelesis Teves, gibutyag niini nga nipasaka na og kaso ang asawa, 41, batok sa iyang bana ug sa babaye.

Nasayran nga wala na makasibat ang duha human gibabagan og yawi ang sakyanan sa bana atol sa pagsikop niini.

Giingon gi-monitor sa asawa ang iyang bana pinaagi sa usa ka informant hinungdan nga nasundan kini sa maong motel.

Niingon ang asawa nga ikaduhang higayon na niya nga nasapon ang iyang bana sa susamang babaye diin ang unang higayon sa usa ka lodging house sa Opol, Misamis Oriental diin iya ra kining gipasaylo human nisaad nga dili na mousab.

Sa pagsulat niini nga balita, kasamtangang anaa sa bilanggoan ang mga dinakpan ug pahimangno usab ang mga otoridad nga magpatinud-anon sa ilang mga kapikas aron walay mahimong problema.