MOBALOR sa P102,000 sa mga pakete sa gitouhang shabu ang nasakmit gikan sa usa ka lalaki nga nadakpan sa mga operatiba sa Philippine Drug Enforcement Agency (PDEA) Northern Mindanao.

Sa pagpangulo ni PDEA-Northern Mindanao Regional Director Wilkins Villanueva nasikop si Amiel Caw-it Enot, taga Purok Sampaguita, Barangay Colupan Bajo, lungsod sa Sinacaban, Misamis Occidental.

Kuyog sa PDEA ang Provincial Intelligence Branch sa Misamis Occidental ug Sinacaban Municipal Police Station, gisilbi ang search warrant batok kang Enot nga miresulta sa pagkasikop niini.

Nasayran nga si Enot usa ka incumbent kagawad sa Barangay Colupan Bajo, Sinacaban, Misamis Occidental ug giingong paryente ni Mayor Crisenciano Mahilac ang incumbent mayor sa lungsod sa Sinacaban kinsa lakip sa anaa sa listahan nga gipagawas ni Presidente Rodrigo Duterte.

Nakuha sa iyang posisyon ang 26 ka mga pakete sa gitouhang shabu nga gibana-banang motimbang og 15 gramos.

Samtang ang mga nakuhang ebidensya ang gidala na sa Philippine National Police (PNP) Misamis Occidental Laboratory Office alang sa masusi nga eksaminasyon samtang suspek temporaryong detinado sa PNP Misamis Occidental Detention Cell.

Una na nga mibhad si Villanueva nga dili sila mohunong sa pagpangsikop niining mga nalambigit sa pagpayuhot sa ginadili nga druga.