“SORRY Auntie Sharon sa ako gibuhat.”

Kini ang gibilin nga sulat sa usa ka batan-on human gituohang naghikog Sabado, Septiyembre 7, sa Parola, Macabalan, Siyudad sa Cagayan de Oro.

Ang biktima nga si Giovani (bansagon gitago), 18, usa ka tinun-an sa Grade 8 ug wala nay mga ginikanan.

Sa inisyal nga impormasiyon gikan sa Cagayan de Oro Police Office (Cocpo), giingong nga nakasala ang biktima sa ilang silingan human nisulod sa balay ug nanghikap sa paa sa iyaan. Giingong gikasab-an kini ug giingnan nga isumbong hinungdan nga nidagan kini pauli.

Nakurat na lamang ang ig-agaw sa biktima nga wala na nigawas si Giovani hangtud nga giingong nakit-ang naghikot sa liog gamit ang straw.

Giingong sa suicidal note o sa gibiyaang sulat niini gikabutyag nga nangayo kini og pasaylo sa iyaan.

Gidugang pa nga posibleng naulaw kini sa iyang gibuhat hinungdan nga nahimo ang paghunos sa kaugalingong kinabuhi.

Gidala pa sa Northern Mindanao Medical Center (NMMC) ang biktima apan walay swerteng nakabsan sa kinabuhi.

Gisuta pa ang tinuod nga rason sa pagpakamatay niini.

Samtang, giawhag sa Department of Health ang kadtong adunay mental health crisis sa pagtawag sa 24/7 hotline sa National Center for Mental Health 0917 899 8727 (USAP) ug 989 8727 (USAP).