NAUGDAW ang bodega sa Philippine Long Distance Telephone (PLDT) Martes, Agusto 13 sa dalan Max Suniel street, Carmen, dakbayan sa Cagayan de Oro human gilamoy sa kalayo.

Anaa sa P5 milyones ang natalang inisyal nga damyos sa istraktura sa pagkasunog sa maong bodega diin nagsugod ang kalayo mga alas 4 sa kaadlawon.

Sa pakighinabi kang Senior Fire Officer 3 Samson Velarde, Carmen fire station commander, gibutyag niini nga mga alas 7:40 sa buntag wala nay angayang ikabalaka tungod kay nalibotan na ang warehouse.

“P5 million more or less structural damage lang siya, subject pa ni siya nga motaas, taas nga anggulo among gitan-aw ang electrical,” matud ni Velarde.

Nasayran nga mga alas 4:06 sa kaadlawon narespondehan sa BFP ilabi na sa Carmen Fire Station ang hitabo ug gideklarang 2nd alarm mga alas 4:07, 3rd alarm mga 4:08 ug 4th alarm mga alas 4:13.

Giingong sulod sa mga bodega ang dagkong cable wires, fiber modem ug uban pa.

Sa pagsulat niini nga balita Martes, padayon pa nga gi-imbestigahan ang tinubdan sa pag-ulbo sa dakong kalayo.