KARONG adlawa gitakdang madawat na sa mga empleyado sa Kapitolyo ang ilang gipaabot nga midyear bonus nga nahimong kontrobersiyal human niadtong katapusang adlaw sa Hunyo wala kini gi-release.

Gipahayag ni Misamis Oriental Governor Bambi Emano ang maayong balita alang sa iyang mga casual ug regular nga empleyado atol sa blessing ug turnover sa pagkatibawas na sa Jasaan-Claveria Provincial Road nga adunay gitas-on nga 8.94 kilometros didto sa Upper Natubo, Jasaan, Misamis Oriental nga mikabat dul-an P100 milyones.

Matud ni Emano nga niabot na og 100 days iyang pamunoan ug iyang nakita nga ang mga empleyado naningkamot ug daghan na ang mga nahuman ug natunol ngadto sa katawhan.

Gani daw nalipay siya sa kanindot sa resulta sa dalan nga natibawas na sa lungsod sa Jasaan.

Gipaabot sab niini ngadto sa iyang mga empleyado nga ang kantidad nga madawat gamiton sa insakto, ibayad kon dunay utang, ihatag sa asawa aron mabudget niini para sa mga anak ug mabayad sa tuition.

Dugang sab niini nga dili kini gamiton sa paghubog-hubog tungod kay bisan gamay lang kini nga kantidad dako na kaayo og tabang sa pamilya.

Matud ni Emano nga ang mga empleyado nga angayan hatagan og reward ug pasidunggan kon kini nagbuhat sa iyang trabaho.