TIKLO ang giingong “Budol gang” niadtong Agusto 8, 2019 pasado alas 5:00 sa hapon sa C.M Recto Avenue kinsa giingong taud-taod na nga namiktima sa mga senior citizen sa Siyudad sa Cagayan de Oro.

Ang mga suspetsado naila nga si Maricel C. Rongcalla, 24; Blitz Lyam Onde, 20, pulos taga Youngsville, Igpit, Opol, Misamis Oriental; Teresita Palapas Pasaylo, 43, taga Purok 5, Kauswagan, Lanao Del Norte; Jovelyn Olasiman Juntilla, 44, taga Balingasag, Misamis Oriental ug Gina R. Pardillo, 53, taga Lapayan, Iligan City.

Nasikop kini atol sa gipahigayong follow up operation sa kapulisan sa Police Station 2 sa Cogon human nga na-korner sa C.M Recto National Highway.

Nakuha usab sulod sa ilang sakyanan ang .38 revolver ug granada lakip na usab ang mga budol money.

Sa pakighinabi sa SunStar Superbalita kang Police Captain Tessie Lleva, station commander sa Police Station 2 sa Cogon, gibutyag niini nga dul-an usa ka dekada na ang ilegal nga operasiyon sa mga suspetsado sa siyudad ug dili na maihap ang ilang mga nabiktima.

Giingong sagad sa mga biktimahon sa mga suspetsado mao ang senior citizen nga babaye nga nag-inusara nga anaa sa mall o sa usa ka bangko.

Istilo sa mga suspek nga ipasakay sa sakyanan ug magpatuo nga kaila o paryente hangtod nga mosalig ang biktima ug makasulod sa panimalay.

“Marami po buong Cagayan de Oro since 2007, actually ang pinakamalaki na nabiktima na elderly is amounting to P300,000 alone ha iisang biktima lang yun pero yung totality, sa dami ng victims nila hindi na po namin ma account maybe worth millions na po kasi ang tagal na nilang nag operate,” matud ni Lleva.

Gisuta pa usab sa kapulisan ang kamatuoran sa giingong nang-hypnotized ang mga suspetsado.

"Hindi pa namin ma established kung talagang they used hypnosis para ma control po yung victim nila, ang pwedi lang naming ma-established is through sweet talk," dugang pa.

Giingong gi-imbestigahan pa kun aduna pa kini laing mga kauban ug gikatahong aduna kini silay financier.

Nanawagan usab kini sa mga nabiktima sa giingong budol nga modangop sa ilang buhatan aron nga madugangan ang kasong ipasaka sa mga suspetsado ilabi na kun maila kini nga maoy nangilad kanila.

Mag-atubang sa kasong illegal possession of firearms and explosives ang mga suspek ug gihan-ay pa ang kasong estafa o swindling.