GIMUGNA sa lokal nga kagamhanan sa dakbayan sa Cagayan de Oro ang Butane Canisters Task Force nga motutok ug mapahunong na ang ilegal nga pagpang-refill sa mga butane canisters.

Kini human sa insidente diin namatay ang mag-apohan human niulbo ang kalayo niadtong nilabay nga semana sa Barangay Canitoan.

Sa pakighinabi ngadto na kay Superintendent Alan Cabot, District Fire Marshal, nga kining executive order nagtudlo kaniya isip vice chairman samtang si konsehal Romeo Calizo, tsirman sa police, fire and public safety maoy tsirman.

“Mag-confiscate mi og butane canisters kay ang reality dili man gyud na siya original nga butane kay LPG, so bawal gyud na siya,” matud ni Cabot.

Naghangyo usab kini sa katawhan ug sa mga tindahan nga gapamaligya pa niini nga i-uli o dalhon ang mga butane canisters sa pinakaduol nga mga fire station.

“Para malikayan nato maghangyo mi sa mga tindahan nga ilang i-turn over o i-surrender nila sa pinakaduol nga fire station, kay atong i turn over sa DOE kay sila man ang government agency nga authorized nga mag store ana,” dugang ni Cabot.