MAPASIGARBUHON nga gi-anunsiyo sa lokal nga kagamhanan sa siyudad ang laing garbo na usab human nasakmit ang award nga “Seal of Child-Friendly Local Governance” niadtong Nobiyembre 8, adlaw nga Biyernes.

Lakip nga naangkon ang “Regional Winner for 2018 Presidential Award for Child-Friendly Municipalities and Cities.”

Gibutyag sa City Administrator Teodoro Sabuga-a nga importante kini nga award tungod kay pinaagi niini mapakita nga ang dakbayan gihatagan og dakong importansiya ang mga kabataan.

“Atong mapakita nga kita sa Cagayan de Oro atong giatiman ang atong mga kabataan. Importante dinhi ang outlook sa local governance, kinahanglan nga ang mga bata as a local government, you embrace also as your children,” matud niini.

Anaa na sa 208 na ka mga child development center ug 53 ka mga home based child development center ang siyudad alang sa mga kabataan.

Samtang ang Oro Youth Development Council namahimo usab nga usa sa mga top 10 awardee sa National.

Ang siyudad sa Cagayan de Oro nipasar usab sa 2018 Child-Friendly Local Governance Audit ug ang dunay pinakataas nga rating nga 97 porsinto kung itandi sa laing mga Local Government Unit (LGU) sa Rehiyon 10 gani nahimo kining National finalist sa search for Presidential Award for Child-Friendly Municipalities and Cities niadtong tuig 2018 ug karon naa na sa top 2 ang dakbayan.