NAGTINGKAGOL sa prisuhan ang suspek sa pagpanglugos sa usa ka call center agent sa Mabulay Street, Barangay 27, Dakbayan sa Cagayan de Oro Dominggo sa kadlawon, Septiyembre 29, 2019.

Giila ang biktima nga si Kristel (dili tinuod nga pangalan), 23, dalaga, lumad nga taga probinsya sa Bukidnon ug nagtrabaho isip call center agent sa Dakbayan sa Cagayan de Oro.

Sa inisyal nga imbestigasyon sa Police Station 2 sa Cogon, nasuta nga ang biktima nagbaklay kadlawon sa nahisgotang dapit.

Giingong kalit siya gibira sa usa ka lalake ug gidala sa usa ka abandonadong balay pinaagi sa pagtion og barbecue stick ug didto gihimo ang pagpanglugos.

Maayo na lamang nakasinggit ang biktima ug nakapangayo og tabang hinungdan nga dali nga miresponde ang mga barangay tanod ug malampuson nga nadakpan si Tomines.

Giila ang suspek nga si Arjay Tomines, 30, taga Bulua ning siyudad.

Napasakaan na og kasong rape batok sa suspek.