BUOT sa city administrator sa lokal nga kagamhanan sa siyudad sa Cagayan de Oro nga i-rekomenda sa City Council aron hingpit na nga makahimo og ordinansa kalabot na sa pagbutang og mga closed circuit television (CCTV) camera sa matag barangay.

Gibutyag ni City Administrator Teodoro Sabuga-a nga buot niini nga mag-endorso og rekomendasiyon ngadto sa City Council pinaagi sa komitiba sa Police, Fire and Public Safety.

Matud ni Sabuga-a nga dako ang matabang niini labi na sa pagpugong sa kriminalidad o sa pagsugpo sa mga krimen ug dili lang kalabot niana lakip na usab aron makita kung kinsa kining mga gapanglabay og mga basura.

"Ang tuyo ana intention nato diha is maka deter kana sa kriminalidad labi na kanang atong pagpanglabay, so makita na na nato kinsa ba kining mga lugar nga galabayanaan sa basura," matud ni Sabuga-a.

Gidugang pa niini nga unta usab ang mga barangay deretso nga mo-aksiyon kalabot na niini labi na diha sa mga dapit nga sagad labayan og basura nga butangan og mga suga ug CCTV camera.

Nasayran nga nagpahigayon ang Hapsay Sapa og laing cleaning operation ug ubay-ubay pa gihapon nga mga basura ang nahipos gikan sa Bitan-ag Creek diha Valenzuela Road sa Barangay Lapasan.