IPAKATAP sa rota sa Traslacion ang mga myembro sa City Local Environment and Natural Resources (Clenro) Martes, Enero 8, aron sa pagpamadlong sa mga makitang maglabay og basura sa bisan asa.

Gibutyag ni Engineer Armen Cuenca, chairman sa Clenro nga ila lamang badlungon kutob sa makita nga maglabay og basura sa bisan asa nga dapit ilabi na nga duna’y mga dili taga siyudad sa Cagayan de Oro ang gilaumang modagsa.

“Karong Traslacion, ang Clenro mokatag sa iyang mga sakop sa rota sa parada, pagbadlong lang, kuhiton lang nga di na mao, di na pwede sa Cagayan so palihog ayaw na usba kay sa sunod mamultahan naka,” matud ni Cuenca.

Gidugang pa usab niini nga kini pamaagi aron nga dili na usab magmahay kun ugaling ma-implementar na usab kini sa siyudad.

“Aron ma aware, aron sa sunod nila balik ilabina kun ma implement in full na nato di na sila magmahay kay ato na silang i-penalty,” dugang ni Cuenca.

Una na niini nga gibutyag nga sa matag dagkong okasyon sa siyudad susama niini ang ilang buhaton aron nga mapahibalo sa tanan ug masayod ang katawhan kung unsa ka importante ang pagkaresponsable bisan sa gamay nga pamaagi.

Gilaumang anaa sa kapin 200 mil ka katawhan ang modagsa atol sa kapistahan sa Nazareno.