NAGPAHIMANGNO ang Commission on Elections (Comelec) sa mga nakaduso na sa ilang mga kandidatora nga dili una mangampanya human gitapos pag Huwebes, Abril 19, ang pagduso sa certificate of candidacy.

Sa pakighinabi sa SunStar SuperBalita kang Atty. Ramil Acul, City Comelec officer, gibutyag niini nga kinahanglan nga mosunod sa balaod ang mga nakaduso na sa ilang mga kandidatura.

“Kinahanglan mosunod na ta kung unsay patakaran sa balaod nga dapat dili sa mangampanya karon kay ang campaign period nato May 04 to May 12, apil na diha ang pagdikit sa mga poster, election paraphernalia, diha lang gyud sa common poster area,” pahayag ni Acul.

Nasayran nga kung adunay mga maghimo sa pagpatapot sa ilang mga posters ug uban pa nga mga election paraphernalia ug masapon nga kandidato nga nangampanya na sa wala pa ang campaign period ipataho sa buhatan sa Comelec.

Tungod kay paglapas kini sa balaod sa eleksiyon o naghimo sila og premature campaigning nga usa ka election offense.

Giingong kasamtangan pa nga gihan-ay sa Comelec ang tibuok nga listahan sa mga nakaduso na sa ilang kandidatura.