MALAMPUSONG naluwas sa City Disaster Risk Reduction Management Department (CDRRMD) ang usa ka babaye human gi-ukoy niadtong Dominggo, Enero 26, sa gabii sa billboard atubangan sa Pryce Plaza, Masterson Avenue, Carmen, siyudad sa Cagayan de Oro.

Ang maong babaye nag-edad og 18 anyos nga taga Upper Carmen kinsa nisaka sa 20 feet nga billboard.

Gibutyag ni Nick Jabagat, ulo sa City Disaster Risk Reduction Management Department (CDRRMD), nga pag-abot sa rescue team, ilang gi-ukoy ang babaye hangtod nga nakasaka sa taas ug nagunitan kini.

Giingong wala nakaatubang sa kalsadang bahin ang babaye rason nga nakasaka ang mga nagresponde.

"Naka siyansa sila og saka sa billboard ilang gihinay-hinay og ukoy until naabot sila sa taas pag-abot sa taas nagunitan nila ang babaye, gi-istorya, gipakalma ang babae," matud ni Jabagat.

Gidugang pa niini nga gimaymayan kini ug gipasabot kung unsa ang ka-importante sa kinabuhi rason nga nakasabot kini ug gihinay-hinay og pakanaog.

Unang nibutyag ang biktima nga buot na niini nga tapuson ang kinabuhi aron mosunod sa iyang higala kinsa giingong nagpakamatay usab ug gidugang pa nga duna kini problema sa pamilya.

Nagpahimangno kanunay ang lokal nga kagamhanan sa siyudad nga dili solusyon ang pagpakamatay sa mga problema ug kinahanglan nga motawag sa 911 aron matabangan.