MAS nidaghan ang nidagsa nga mga deboto sa mga religious sites sa Siyudad sa Cagayan de Oro ilabi na sa Guadalupe Shrine sa Barangay Tablon atol sa Semana Santa.

Anaa sa di momenos 90 mil ka mga deboto ang nisaka sa Bukid sa Malasag ug sa Birhen sa Guadalupe niadtong sa Huwebes ug Biyernes Santo. Sa Gudalupe Shrine anaa sa 63 mil itandi sa nilabay nga tuig nga anaa sa 57 mil samtang sa bukid sa Malasag anaa usab sa dul-an sa 30 mil ka mga deboto.

Sa pakighinabi kang Police Lieutenant Colonel Mardy Hortillosa, tigpamaba sa Cagayan de Oro City Police Office (Cocpo) gikumpirma niini nga mas daghan ang nidagsa nga mga deboto karong tuiga itandi niadtong nilabay nga tuig.

“Mi-increase ang tao nga nag-adto bisan pa man sa kainit sa panahon, yes midaghan this year,” matud ni Hortillosa.

Malinawon usab ang maong paghandom sa kamatayon sa Labaw nga Makakagahom apan gikasubo lamang sa kapulisan ang natigayong pagpangdunggab nga nahitabo sa Malasag.

“Generally peaceful bisan pa man naay dunggab nahitabo sa Malasag,” dugang niini.

Gitin-aw usab niini nga hugot ang gipatuman nga seguridad sa pagpasulod sa katawhan sa maong lugar apan giingong dunay mga residente sa sulod ug dunay mga agi-anan usab gawas sa entradang bahin sa maong dapit. Gipaniguro nga mas pahugtan pa ang pagbantay sa sunod niini.

Duha ka insidente sa pagpangdunggab ang nahitabo atol sa Biyernes Santo sa bukid sa Malasag diin ang tulo ka mga biktima niini anaa sa luwas nga kahimtang.