AMINADO ang buhatan sa Department of the Interior and Local Government (DILG) sa Misamis Oriental nga adunay mga lapses niadtong unang pagpatuman sa road clearing operation nga nahitabo sa niaging tuig kay igo lamang kini nga nagbasi sa kamandoan ni Presidente Rodrigo Duterte sa atol sa State of the Nation Address niini.

Si DILG-Misamis Oriental director Marisia Naybe nagpasabot sa pipila ka mga kabag-ohan sa pagpatuman sa road clearing.

Una giklaro niini nga dili kini road widening kay trabaho na kana sa Department of Public Works and Highways (DPWH).

Gidugang niini nga ang DILG naghatag lamang sa local government units (LGUs) og 75 ka adlaw aron mahuman ang ikaduhang hugna sa road clearing operations sa ilang nagkadaiyang lokalidad aron kuhaon ang dalan nga gipanag-iyahan sa gobyerno basi sa kamanduan ni Duterte.

Pinaagi sa DILG Memorandum Circular 2020-027 si Secretary Eduardo M. Año nidirekta sa tanang LGUs nga ipadayon ang implementasyon sa road clearing.

"Una nga intruksyion nga dapat ang road clearing is not road widening, i-clear lang nato ang naay obstruction nga sidewalks ug wala na kanang sukod-sukod," pasabot ni Naybe.

Sa bag-ong kamanduan usab giklaro niini nga dako na kaayo og papel ang barangay niini kay kinahanglan silang mosumiter og report ngadto sa DILG, gihatagan sab kini og responsibilidad nga maoy mosustiner sa pag-clear sa sidewalks sa matag area.

Aduna sab assessment team nga molangkob niini ang DILG, Bureau of Fire Protection (BFP), Philippine National Police, Municipal Engineering Office, ug miyembro sa Civil Society Organizations.

Dugang pagklaro niini nga ang tanang dalan kinahanglan nga i-inventory kun unsa nga mga dalan ang adunay obstruction ug i-cleared, kinahanglan sab nga kun adunay maapektuhan niini, tabangan kini sa lokal nga kagamhanan.

"Actually daghan question last road clearing kay nganong naay gasukod-sukod which is not correct kay instruction ra gyud is i-clear nato ang sidewalks para libre moagi ang mga tao aron dili siya moagi didto sa daplin sa kalsada kay basin madisgrasya unya siya," matud ni Naybe.