NAGDEKLARA og code blue ang tinugyanan sa Department of Health (DOH)-Northern Mindanao kini lakip sa ilang pag-alerto diha sa pakigbatok sa dengue ilabi na nga epidemic na ang rehiyon.

Nasayran nga sugod sa Enero hangtod Agusto 17 anaa na sa 70 ang natalang patay sa tibuok rehiyon diin nag-una ang Bukidnon gisundan sa Misamis Oriental ug Lanao del Norte, Misamis Occidental ug Camiguin.

Gibutyag ni Dr. David Mendoza, officer-in-charge sa DOH-Northern Mindanao, nga kini parte sa ilang pag-alerto diin alang sa ilang mga personahe.

"When we talk of code blue sa amo lang na siya sa mga health personnel nga kung mo sobra pa gyud siya pag-ayo that's the time nga ang among mga empleyado wala nay mobiyahe, wala nay manlakaw," matud ni Mendoza.

Gidugang pa niini nga ang pinakataas mao ang code red.

"Highest ang red kung mag code red gani ta nagpasabot na nga the local government unit or the community could no longer cope up, wala na pildi na tanan," dugang pa.

Giingong kini parte lamang sa pag-alerto sa tinugyanan sa DOH aron nga malikayan ug matutokan gyud ang mga angayang buhaton aron nga mapakgang ang padayong pagtaas sa ihap sa nataptan sa dengue virus.