POSIBLENG mag-atubang og kaso ang usa ka drayber nga nitangtang sa clamp sa Roads and Traffic Administration (RTA) sa usa ka sakyanan niadtong Septiyembre 8 sa Capistrano street, Cagayan de Oro.

Makitang gi-post sa Facebook page sa RTA ang sakyanan nga Mitsubishi Montero nga pula ug nagdala og numero sa plaka nga KAA 4678 nga nakalapas sa balaod sa kadalanan.

Sa impormasiyon, nasayran nga giparada sa wala pa mailang drayber ang sakyanan mga alas 5:32 sa hapon sulod sa yellow box rason nga gi-clamp kini.

Gibutyag ni Benedicto Ramiro, taga RTA, nga posibleng makasohan ang drayber ilabi na sa pag guba sa kabtangan sa gobyerno ug pagadalhon una kini nga panghitabo sa buhatan sa City legal ug giimbetahan ang maong drayber.

"Ato siyang giimbetaran nga ingkaso unta makahatag siya og information, makahatag siya sa iyang side sa dili pa nato maduso sa sakto nga opisina. But, definitely at first we will go to the LTO (Land Transportation Office)," matud ni Ramiro.

Nasayran nga giingong posibleng amendahan ang ordinansa nga imbes mag-upgrade sa mga clamp aron nga di na magpabilin sa kadalanan ang mga sakyanan nga dunay kalapasan.

Giingong kung ma clamp ang sakyanan, kinahanglan nga motawag sa numero nga gibilin sa RTA ug magbayad og P500 sa city hall para matangtang ang clamp ug sa citation ticket nga illegal parking nga kinahanglan bayaran sa sulod sa 72 oras nga mokabat sa dos mil.

Narekober ra usab ang maong clamp nga gitangtang ug gibiyaan sa maong drayber.

Sa pagsulat niini nga balita nataho na sa tinugyanan sa RTA ang maong insidente sa kapulisan.