NALATAYAN sa nagdagan nga trak ang mga lawas sa duha ka mga lalaki human nipasok ilawom ang gisakyan nga motorsiklo niadtong Dominggo, Pebrero 16, mga 1:50 sa hapon sa Maramag-Maradogao Road, P10A, San Miguel, lungsod sa Maramag, Bukidnon.

Patay sila si Nelvin Labanon Batingal, minor de edad, taga P-2A, San Miguel, Maramag, Bukidnon kinsa maoy nagmaneho sa motorsiklo ug back-rider nga mao si Rodolfo Oberes Descotido, 32, ulitawo, taga P-10B, San Miguel, Maramag, Bukidnon.

Samtang ang Izusu dropside truck nagdala sa plaka nga AWA 6156, kargado og bag-ong harvest nga tubo gimaneho ni Joney Boy Caburnay Timogan, 48, minyo, taga Poblacion, Pangantucan, Bukidnon.

Sa imbestigasyon sa Maramag Police Station ubos kang Police Lieutenant Colonel Casan Ali, nasuta nga gikan ang trak sa Pangantucan, Bukidnon padulong Maramag.

Pag-abot sa kurbada nga bahin sa dalan, niabot ang motorsiklo gikan sa pikas direksyon apan na-overshoot kini hinungdan sa pagsungag ug nilahos ilawom sa trak. Gumikan sa kusog nga impak, dili tiaw ang kadaot nga naangkon sa mga biktima human nalatayan pa kini sa nagdagan nga trak nga maoy hinungdan sa ilang kamatayon.

Ang patayng lawas sa mga biktima gidala pa sa Bukidnon Provincial Hospital sa maong lungsod alang sa post mortem examination samtang ang driver sa trak boluntaryong mitahan sa iyang kaugalingon.

Si Police Colonel Roel L. Lami-ing, ang Provincial Director sa Bukidnon Police Office, nagmando sa kapulisan nga ipatuman ang balaod trapiko lakip pag-edukar sa motorista aron malikayan kini nga susamang insidente.