GI-IMBESTIGAHAN ang laing panghitabo diin giingong misteryuso nga nakitang nagpasak nga daghang dugo sa usa ka panimalay nga walay tawo sa District 3, Barangay Consolacion, Cagayan de Oro.

Gibutyag sa tag-iya sa maong balay nga nagpasak ang dugo sulod sa ilang panimalay nga nakasarado man kini ug walay tawo kay natulog ang tagbalay sa ilang iyaan gumikan kay naputlan og kuryente.

Sa pakighinabi sa SunStar Superbalita kang Police Executive Master Sergeant Terencio Virtudazo, Police Community Relation (PCR) sa Police Station 5 (PS5) sa Macabalan, gibutyag niini nga imbestigahan nila kini ug sutaon kung unsa ang tinubdan sa maong dugo.

"Among gipa-examine sa crime lab wala pay resulta. Daghan man didto nagpasak sa dining, sa duha ka kwarto," matud ni Virtudazo.

Gidugang pa niini nga nakita usab nga ang ilang iro diin susama nga na-trauma ug nagluya, ug duna pa'y samad sa kilay.

"Daghan lage dugo nagpasak mao na gakatingala pud ta. Kato lang dugo atong ipa-examine kung animal ba or human," dugang pa.

Nibutyag ang kapulisan nga base sa siyensa nga dili tinuod ang mga wakwak o balbal. Apan sa karaan, dunay mga istorya apan wala'y makasuporta o makapakita og ebedensiya nga tinuod ang ilang presensiya.

Dili usab makatoo ang tag-iya sa balay nga dugo kini sa ilaga o bisan unsa nga mananap tungod sa grabe sa kadaghan niini, lakip sa ilang mga sinina ug sarado usab ang ilang balay.

Gidugang pa nga katingad-an kini tungod kay walay nawala usab nga mga butang sa maong balay.

Kahinumdoman nga niadtong nilabay nga mga semana kumbinsedo ang mga residente ilabi na ang nakakita o tag-iya sa balay diha sa may Bag-ong dalan sa Consolacion nga nakita niini ang balbal o aswang gani rason nga nakuhaan ang usa ka mabdos.