GISUGYOT ni Misamis Oriental Governor Bambi Emano nga unta malakip sa National Inter Agency Task Force (IATF) ang Union of Local Authorities in the Philippines (ULAP) labina sa pagtabang og sugyot sa mga gabayan sa pakigbatok sa Corona Virus Disease (Covid 19).

Matud ni Emano nga kining ULAP gilangkoban kini sa mga presidente sa Governor sa nasud, presidente sa Mayor sa nasud, presidente sa mga bise mayor sa nasud, konsehal sa nasud ug presidente sa mga kapitanes sa nasud.

Apan subo lamang si Emano nga gawas ug wala lakip gihapon sa IATF ang ULAP.

Gipasabot ni Emano nga gikinahanglan ang tingog sa mga local leaders ug mga komento ug reaksyon aron makatabang sa pagpanday ug paghimo sa mga guidelines kon diin ang implementasyon ang lokal nga kagamhanan man ang magpatuman.

"I have been proposing nganong dili apilon ang ULAP nganong dili i-apil sa IATF aron kung magbuhat silag balaod dunay reaksyon deretso gikan sa local government unit and yet they decided nga ipagawas gihapon ang ULAP sa IATF," matud ni Emano.

Di mapugngan ni Emano nga madismaya sa mga pag-usab usab nga mga guidelines nga giapagawas sa National IATF.

Apan mapasalamaton gihapon kini nga lakip na ang Governor ug mga mayor sa Regional IATF ug makapaabot na sa ilang mga suhestiyon kon hisgotan ang pakigbatok sa Covid 19.