GISUGDAN na ang pagpang-renew sa mga business permit sa dakbayan sa Cagayan de Oro sugod niadtong Enero 2, 2020 ug matapos kini sa petsa 20 ning bulana.

Target nga makolekta sa siyudad ang anaa sa P7.5 bilyones base sa naaprobahang pundo nga gipangayo ni Mayor Oscar Moreno alang sa dugang kalamboan sa dakbayan.

"Actually, naa may mga target. In fact, ang atong revenue target for the year is P7.5 billion man kay mao man na atong budget so ang budget, kinahanglan ang expenditure nimo magbase man na sa imong traget income," matud ni Teodoro Sabuga-a, city administrator.

Gibutyag ni Sabuga-a nga taman lamang sa petsa 20 sa Enero ang pagdawat sa mga mag-renew sa ilang mga business permit. Giingong ang dili maka-renew sa gitakdang panahon duna nay multa.

"Kay kami kung dili namo e-extend, wa sila maka renew mag penalty man, mas advantage man na namo, but we are so considerate also once naay request kung walay request 20 gyud na," matud ni Sabuga-a.

Gidugang pa niini nga sa duha ka adlaw gikan sa pagsugod gamay pa lang ang nag-renew.

Naghangyo usab si Sabuga-a sa mga empleyado sa city hall nga dunay mga sakyanan nga hatagan og pabor ang mga tax payer diha sa pagparada ug sa layo una mag-parking samtang kamulo pa ang renewal.

"Atong mga private cars palihog palayo nalang mo pangita mo lain kung di ba ayaw nalang mog dala og sakyanan kung dili mo ganahang parking palayo isa lang ka buwan lang ni ang atong hangyo," dugang niini.

Gireserba ang parkingan sa mga magbayad ug mag-renew sa ilang mga business permit ang minipark sa city hall ug likod sa Lourdes paingon sa Jollibee aron mas mapasayon alang kanila.