MOKABAT 200,000 ka mga tinun-an ang nag-enroll sa nagkalain-laing mga publikong tunghaan sa siyudad sa Cagayan de Oro diin gibuksan ang klase kagahapon, Hunye 3.

Gibutyag ni Dr. Jonathan Dela Peña, City Schools Division superintendent, nga hangtod sa Hulyo 30 pa ang kataposang adlaw sa ilang pagdawat sa mga buot magpa-enrol.

Apan gihangyo ni Dela Peña nga mas maayong magpa-enrol na ug dili na magpaabot sa Hunyo 30.

"Sa elementary 93,000 sa mga public schools, sa junior high around 39,000, sa senior high school mga 5,000 sa public lang na kay like sa senior high mga 13,000 sa private," matud ni Dela Peña sa usa ka sibayaan sa radyo.

Nasayran nga atol sa unang adlaw sa sayong kabuntagon ubay-ubay na ka mga katawhan ang midagsa sa nagkadiayang tunghaan ilabi na sa City Central School.

Sa unang adlaw usab sa pagbukas sa klase, mamatikdan ang mga police assistance desk nga gipahimutang sa ganghaan sa mga publikong tunghaan ning siyudad.

Duna usab mga uniform police officer nga makita gawas sa mga tunghaan aron pagsiguro sa kaluwasan sa mga tinun-an.

Una na nga gipahigayon sa Cagayan de Oro City Police Office nga ubay-ubay sa ilang mga personahe ang nakamuntar sa mga tunghaan apan gipanawagan ang mga ginikanan sa pagbantay gihapon sa ilang mga anak.