GIKLARO sa tinugyanan sa Cagayan de Oro Police Office (Cocpo) nga gumikan lamang sa sayop nga impormasiyon hinungdan sa pagka-alarma sa mga residente sa Barangay Pagalungan ug uban pa niadtong Pebrero 19.

"Nagsulti to nga tawo nga nakakita siya og sparks flash sa lighter sa abandoned nga balay, mao dayon to nagtoo na siya sa iyang hunahuna nga mao na to ang armado nga grupo," matud ni Police Superintendent Mardy Hortillosa, tigpamaba sa Cocpo.

"Mao pud na ang naka trigger sa ilaha nga mag-cause og panic ug kahadlok. Mao pud naka-trigger sa ila para mag-evacuate until such time nga nagkatag na katong naay mga sakyanan niadto na sa Lumbia," dugang niini.

Naghangyo si Hortillosa sa katawhan sa dili pagtoo gyud dayon sa mga nadunggan ug angayang sutaon una ang kamatuoran niini.

"Resulta sa misinformation. Kami sa PNP naghangyo nga atoang mga tawo nga unta makadungog sila og ingon ani. Ilang e-validate daan ug mohulat sila sa confirmation sa atoang authorities para ani nga issue para dili maka-create og panic sa ilaha," matud ni Hortillosa.

Nangayo usab kini og pasensiya ilabi na ang Cocpo, sa pagpangulo na usab ni Police Senior Superintendent Nelson Aganon, city director, human nga dugay usab sila nakahatag og kompirmasyon kini gumikan na usab kay ila pa nga gisuta ug alang sa seguridad sa personahe nga mo-imbestigar ug masuta sa kamatuoran niini.

"Ang among city director nangayo og pasaylo sa media ug sa atong mga katawhan nganong wala dayon nato gi-confirm kay, of course, ang among gihuna-huna nga amo sang e-validate daan ug among gihuna-huna most importantly ang among security personnel nga magvalidate didto sa taas," matud niini.

Gidugang pa usab nga rason nganong dugay ang paghatag og kompirmasiyon aron nga dili makahatag og kabalaka sa katawhan sa maong dapit.

"Basin unya'g magcount ta og patay sa government side if tinuod man galeng if di pud tinuod at least dili ta maka create og panic ngadto sa katawhan," dugang niini.

Nasayran nga mga anaa sa kapin kon kulang 500 ka indibidwal ang mihikling sa Lumbia nga nagagikan sa Sitio Batinay gikan sa Barangay Tagpangi ug Pagalungan human usab sa kabalaka sa giingong presensiya sa armadong grupo diin walay kamatuoran.