NAKABSAN sa kinabuhi ang usa ka amahan human naghikog pasado alas 3:30 sa hapon niadtong Biyernes, Marso 22, sa Barangay Taytay, Siyudad sa El Salvador, Misamis Oriental.

Ang biktima mao si Ronrey Nacalaban, 38, minyo, residente sa susamang dapit.

Si Police Senior Inspector Princess Joy Enriquez, kinsa tigpamaba sa Misamis Oriental Provincial Police Office (Moppo) niingon nga posibleng tungod sa depresyon ug frustration nagpakamatay ang biktima.

Giingong bag-o lang mibiya ang asawa niini ug wala na mibalik.

Gibutyag sab sa ilang mga silingan nga gibiyaan sab sa asawa ang ilang tulo ka mga anak.

Mao na lamang nadawat nga report sa kapulisan nga naghikot na kini og pisi sa iyang liog sulod sa puloy-anan.

Daling miresponde ang kapulisan apan maoy ilang naabtan nga wala nay kinabuhi ang biktima nga nagbitay ug naghikot na ang pisi sa liog niini.

Wala sab silay nakitang foul play sa kamatayon ni Nacalaban apan aron makasiguro gisugyot nga ipailawom sa otopsiya ang patay’ng lawas.