ANAA pa lamang sa 20 porsyento ang nahuman sa Hapsay Kable Task Force sa dakbayan sa Cagayan de Oro apan gipaningkamotan nga wala na’y magbitay nga mga spaghetti wire sa mga poste ug kadalanan.

Gibutyag ni Kagawad Teodulfo Bong Lao, chair sa kumitiba sa Public Utilities, nga dili basta-basta ang pagpanghipos sa mga wire nga wala na’y mga gamit hinungdan nga anaa pa sa 20 porsyento apan gipaningkamotan nga sa bulan sa Disyembre nindot na kining tan-awon diin gilauman usab ang pagdagsa sa mga tawo.

“Wala pa naa pa ta sa mga 20 porsiyento pa kay pila pa ka dalan kay di man gud basta basta, at least karong December makita nila nga gwapo na” tipik sa pahayag ni Lao.

Giingong una gipangtangtang ang mga nagbitay nga mga wires ug ang sunod nga himuon sa maong task force mao ang pagplastar niini.

Gitakda usab nga ipahigayon ang Project Velez diin ipaagi na sa ilalom sa yuta ang mga wires o underground system.

Kahinumdoman nga niadtong bulan sa Abril ning tuig 2018 gimugna ang Hapsay Kable Task force nga maoy gitahasang motangtang sa maong mga gitawag nga spaghetti wires.

Karong mga panahona, padayon pa ang pagpanangtang sa mga wires sa dalang Corrales.