GIPAHIGAYON ang interfaith rally Sabado, Pebrero 2, aron ipakita nga ang katawhan sa dakbayan nagkahiusa ug wala'y gipiling relihiyon diin buot lamang nga makab-ot ang kalinaw sa dakbayan sa Cagayan de Oro sa Kiosko Kagawasan sa Divisoria kauban ang nagkadaiyang relihiyosong grupo, lumad, kapulisan ug uban pa.

Sa pakighinabi sa SunStar Superbalita ngadto na kay Police Superintendent Mardy Hortillosa, tigpamaba sa Cagayan de Oro Police Office (Cocpo), nga nakahan-ay na ang seguridad nga ilang ipatuman niini ug gani lakip usab sila sa maong kalihokan aron mapakita nga nagkahiusa ang katawhan sa siyudad.

“Naa na tay nakahan-ay nga security ana, kita ang magdala sa secuirty ana, atong task force oro, of course mo-participate kita, ipakita nato nga ang Cagayan de Oro nagtimbayayongay ang mga katawhan, muslim, lumads and christians,” matud ni Hortillosa.

Hugot usab ang ipatuman nga seguridad sa kapulisan ug nakig-koordinar na kini sa nagkadaiyang mga unit aron nga mamahimong malampuson ang maong kasaulogan.

“Naghatag na og coordination, atong city headquarters ,naghatag na pud og coordination regarding sa mga personnel nato,sa atong EOD, SWAT,” matud ni Police Senior Inspector Rogie Ortencio, hepe sa Police Station 1 (PS1) sa Divisoria.

Ang kalihokan gipangulohan kini sa interfaith sector aron nga mapakita nga nagkahiusa ang tanan ilabi na nga natigayon ang pagpamomba sa mga simbahan sa cathedral sa Mt. Carmel sa Jolo, Sulu ug gisundan sa mosque sa Zamboanga City.

Kini aron usab panawagan nga ipakita sa tanan nga dili kini maka-apekto sa relasiyon sa nagkadaiyang relihiyon sa siyudad ug sa uban pa nga dapit.