MALINAWON ang kasaulogan sa Adlaw sa mga Santos ug Kalag niadtong Nobiyembre 1 ug 2 ning tuig.

Sa monitoring nga gihimo sa kapolisan sa Misamis Oriental, walay mga dagkong insidente nga natala nga may kalambigitan sa selebrasyon.

Gipaabot ni assistant provincial administrator Carol Lim nga gitahasan siya ni Misamis Oriental Governor Bambi Emano nga ipaabot ngadto sa kapolisan sa probinsya ang pahalipay ug pasalamat nga walay mga dagkong insidente nga natala sa lalawigan atol sa kasaulogan.

Lakip sa gipasalamatan sa probinsya ang mga rescue teams sa Provincial Risk Reduction Management Department sa nagkadaiyang lungsod nga nagtukaw ug anaa sa mga matag sementeryo sa lungsod nagbantay lakip ang mga ospital nga nakaalerto.

Samtang gidili sa dakbayan sa Cagayan de Oro ang pagpaaso o palina mamatikdan sa mga sam-ang sa lalawigan ang mga nagpalina niadtong kasaulogan.

Matud sa usa ka batan-on nga nahinabi sa SunStar Superbalita, walay gabadlong kanila ug nagbawal niini hinungdan padayon sila sa pagpaaso kon asa adunay bayad ang molak-ang niini.