WALA’Y laing nadala ang usa ka 71 anyos nga lalaki gawas sa imahe sa Mother of Perpetual Help nga kapin usa ka gatos na ka tuig atol sa sunog sa 12-28th Street, Upper Nazareth, dakbayan sa Cagayan de Oro.

Gibutyag ni Carlito Bajao, ug sa asawa nga si Badigunda, 66, nga dako og importansya kanila ang maong imahe.

Sa pakighinabi kang Bajao, gikabutyag niini nga lakip sa iyang nadala ang nalumping nga telebisyon.

“Kani gyud akong gisiguro, karaan na ni kaayo kabilin pa ni sa akong mga ginikanan gikan pa sa Camiguin wala pa ko natawo ani,” matud ni Bajao.

Nasayran nga nitabang pa kini sa pagsulay sa pagpakgang sa kalayo apan wala na nila natabang hinungdan nga gidali nalang sa pagbitbit ang maong imahe samtang ang Sto. Niño ang wala madala gumikan kay nakahikot kini.

Nagpasalamaton nalang usab ang magtiayon nga bisan nawad-an na sa panimalay luwas ra sila ug walay nakalas nga kinabuhi atol sa maong sunog.