GIDALA na sa Philippine Coast Guard (PCG) ang mga personahe sa MV King Evaristo nga nidunggo diha sa Coastal Road, Barangay Lapasan niadtong Abril 6 mga alas 10 sa buntag ning siyudad sa Cagayan de Oro.

Ang ship captain naila nga si Ernesto Culanag ug mga personahe o tripolante nga sila si Ivem Stephen Verde Vigo nga taga Roxas, Capiz; Madison S Santos nga taga Pampanga; John Harold Fabilio nga taga Caloocan City; Rexfield S Llorico nga taga Capiz ug Ranniel Gala Alvaro nga taga Caloocan City.

Gikabutyag nga ang maong ship gikan sa Siargao ug dunay arrival date nga Abril 1, 2020 ug nidunggo Abril 6 sa Lapasan coastal road.

Nasayran nga nakadawat ang kapulisan og tawag gikan sa tanod sa Lapasan kalabot na sa maong mga personahe gikan sa ship ug sakay sa gamay nga baruto ug nikanaog sa maong dapit rason nga gibabagan kini ug gidala sa estasiyonan aron sa imbestigasiyon.

Samtang gibutyag usab ni Police Major Evan Viñas, tigpamaba sa Cagayan de Oro Police Office (Cocpo) nga anaa na sa Coast Guard ang maong mga personahe.

“Katong mga personahe gidala sa Philippine Coast Guard naghatag og information nga i-sanction nila ang maong kapitan,” matud ni Viñas.

Gidugang pa ni Viñas nga magkuha kini sila og semento sa Oro port ug nagpaabot sa iskedyul sa paglarga.

Nikanaog kini sila aron sa pagkuha og tubig ug gasul gani dunay narekober nga tulo ka water container ug 50 kilos nga tangke sa gasul.

Magpalit usab sila og makaon apan sayop lang kay wala nakigkoordina sa PCG.

“Palit daw pud sila food...sayop nila wala sila moagi sa coast guard kay tugotan man pero usa ra daw dapat manaog,” dugang niini.