NIPARTISIPAR bag-o lang ang kapolisan sa Misamis Oriental sa kampanya sa gobyerno nga “Oplan Pagyanig” nga gipagiyayon sa nagkalain-laing lungsod sa lalawigan.

Gibutyag ni Police Senior Inspector Arlyne Ranario, tigpamaba sa Misamis Oriental Provincial Police Office, nga ang Oplan Pagyanig mao ang ika-4th quarter nga “nationwide simultaneous earthquake drill and observance of the world’s tsunami awareness day.”

Gipahigayon kini sa nagkalain laing buhatan sa gobyerno sa lalawigan niadtong Nobiyembre 5 diin gipakita ang senaryo sa paglinog ug unsay ilang mga lakang ug unsa ka preparado ang buhatan kon masinati kini nga sitwasyon.

Sa probinsya, gipahigayon kini sa PHQ personnel ug Provincial Mobile Force company nga gipangulohan nila ni Police Superintendent Arden Amogod.

Ang mga mekaniks sa drill gilakipan sa duck cover ug hold techniques, evacuations ug salvaging of victims.

Malampuson ang sunod sunod nga kalihokan ug resulta niini nahatagan ang kapolisan lakip mga empleyado sa lain laing buhatan sa munisipyo sa awareness kon masinati ang linog nga lakipan pa og tsunami.