PADAYONG gipangita pa ang mga responsable sa pagpatay sa usa ka abugado alas 6:30 sa gabii, niadtong Dominggo, Hulyo 28, sa Purok 11, Sayre Highway, Barangay Poblacion, Valencia, Bukidnon.

Patay dihang nahidangat sa tambalanan si Nicolas Gomez Jr., 67, lumad nga taga Quezon City.

Sa inisyal nga imbestigasyon sa Valencia City Police Station sa pagpangulo ni Police Lieutenant Colonel Surki Sereñas, nasuta nga gi-parking lamang sa biktima iyang sakyanan nga F150 Ford atubangan sa Imperial Appliance Plaza.

Gibaklay lamang niini paingon sa usa ka bakery apan kalit lang miabot ang duha ka wala mailang suspetsado nga sakay sa motorsiklo.

Nagsul-ob og face mask ug jacket ang mga suspetsado, ug deretsong gipusil ang biktima. Human nakitang nagbuy-od ang biktima, dali silang misibat paingon sa wala matinong nga direksyon.

Ang biktima nakaangkon og nagkadaiyang samad pinusilan sa parte sa kalawasan ug gidala sa SDA Medical Hospital. Apan si Dr. Juniver Flores mideklarar niining dead on arrival.

Narekober sa crime scene ang upat ka mga basyo sa bala sa kalibre 45 ug mga gamit sa biktima.

Padayon ang hot pursuit operation sa kapolisan aron pag ila sa mga suspetsado. Gisuta pa sab kong unsay nag unang motibo sa pagpangluthang karon panahona.