ADUNAY simple nga hangyo si Misamis Oriental Care System (MisOr Cares) head Sandra Lim ngadto sa mga nakabenipisyo o naka-avail sa programa hilabina kining serbisyo nga 3-in-1 diin tabangan ang mga Misamisnon nga mitaliwan sa laing kalibutan.

Agi og balos sab sa serbisyo nga ilang gihatag kanila hilabina niining mga pamilya sa mga namatay nga naka avail sa 3-in-1 nga programa sama sa libreng paghatod sa patay, paghatag og lungon ug balsamasyon.

Unta mokooperar usab ang ilang pamilya human nga mahiluna ang patayng lawas sa ilang kabanay ilang lukatan ang namatay og death certificate.

Kini human nadawat ang reklamo sa mga punerarya nga adunay pagkalangan sa bayad kini gumikan kay ang pamilya sa mga namatay ang usahay dili na magpakabana sa paghatag sa death certificate nga usa sa rekisitos sa punerarya ug sa MisOr Cares nga mabayran ang punerarya nga miatiman sa patay’ng lawas.

“Usa na karon sa among problema apan amo gyod kanang gisolusyonan ug mao nga mohangyo mi sa pamilya nga dili dugayon ang paglukat sa death certificate kay kini ang usa sa requirements,” matud ni Lim ug nipasabot nga gasabton sab nila ang pipila hilabina kon ilang makita ug masuta nga maglisod gyod pag-ayo ang pamilya. (SVB)