TIKLO ang usa ka Korean national human nasapon nga nag-pot session niadtong Agusto 15 sa Barangay Lumbia, Cagayan de Oro.

Naila ang maong dinakpan nga si Dong Young Kim, 66, ulitawo ug kasamtangang nagpuyo sa usa ka hotel sa Barangay Lumbia.

Gibutyag ni Police Colonel Henry Dampal, director sa Cagayan de Oro Police Office, nga nagpahigayon og operasiyon ang operatiba sa Police Station 2 sa Cogon sa pagpangulo ni Police Captain Tessie Lleva, hinungdan sa pagkasikop sa suspek.

Nakuha gikan sa suspek ang duha ka pakete sa gitoohang shabu nga gibana-banang anaa sa 0.25 gramo o anaa sa P2,000 ang kantidad ug mga drug paraphernalia.

Ang maong suspetsado ang kasamtangang anaa na sa mini-cell alang sa pag-atubang sa tukmang kaso batok kaniya.