PAGDUMOT ang giingong hinungdan pagpamusil patay sa usa ka mag-uuma ngadto sa laborer niadtong Dominggo sa gabii, Pebrero 17, sa Purok 4, Barangay Bonbon, lungsod sa Catarman, Camiguin.

Si Senior Police Officer 2 Florendo Soria, imbestigador sa Catarman Police Station, miila sa biktima nga mao si Jetrim Rugay, residente sa dapit.

Ang suspetsado nga mitahan sa iyang kaugalingon giilang si Richard Oyao, 27, residente sa susamang dapit.

Gibutyag sa imbestigador basi sa pasiunang imbestigasyon nga samtang anaa gawas sa ilang puloy-anan ang biktima kalit lang nga niabot ang suspek ug gipusil.

Upat ka samad pinusilan sa nagkadaiyang parte sa lawas ang naangkon sa biktima ug gani gisuwayan pa og dala sa Camiguin General Hospital sa Mambajao, apan gideklarar kining patay na sa paghidangat.

Ang suspek nga mitahan sa tabang sab ni Kapitan Christopher Rodriguez aminado nga nagdumot siya pag-ayo sa biktima tungod aduna silay away niaging semana.

Giingon niining wala siya makabalos dihang gikulata siya ni Rugay hinungdan nga buot niyang makabalos.

Kasong murder gitakdang atubangon sa suspetsado nga nagtingkagol na sa prisuhan. (SVB)