DEAD on arrival sa ospital ang usa ka lalaki human gidunggab sa Purok 4, Puerto ning dakbayan sa Cagayan de Oro, niadtong ala 7:20 Dominggo sa gabii, Marso 17.

Patay si Mark “Tata” Sakro, 39, minyo, taga Purok 1, Barangay Puerto ning dakbayan samtang ang suspek naila nga si alyas “Poloy.”

Sa nahipos nga inisyal nga impormasiyon, gikabutyag nga nagbaklay lamang ang biktima dihang kalit nga giduolan sa suspek ug gidunggab sa makadaghang higayon hinungdan nga nakaangkon og ubay-ubay nga mga samad.

Naabtan na lamang sa kapulisan ang biktima nagkulob na ug gidali pa sa pagdala sa ospital apan walay swerteng nakabsan na sa kinabuhi.

Giingong motibo sa maong krimen mao ang personal nga panagbingkil tali sa suspek ug biktima nga miresulta sa maong duguon nga insidente.

Padayon pa ang kapulisan sa pagpangita sa suspek kinsa nagtagotago na karong panahona.